literapedia bern
Das Lexikon der Berner Schriftstellerinnen
und Schriftsteller

Lauterjung, Gertrud

Aus literapedia bern
Version vom 20. Mai 2015, 17:09 Uhr von HAb (Diskussion | Beiträge) (Textersetzung - „== Weblinks UB Bern ==“ durch „== Bestände UB Bern ==“)
(Unterschied) ← Nächstältere Version | Aktuelle Version (Unterschied) | Nächstjüngere Version → (Unterschied)

Gertrud Lauterjung, auch genannt Gertrud Anna Lauterjung (* 18.4.1911)

Persönlicher Beitrag

Gebore bin i 1911 z Broc/Bulle (FR). Di erschti, trotz em Wältchrieg 1914-1918 glücklechi Jugedzyt hani mit drü Gschwüschterti z Bärn, die zwöiti z Thun erläbt. Mit sächzähni bin i i di koufmännischi Schuel ggange u drüberabe bin i Chinderpflegere worde. Sygs bi Ching, sygs im Büro vo me Toubstummeheim, i der Arbeit mit Ghörlose, es isch es schöns Läbe gsi. Der Usbruch vom zwöite Wältchrieg hani ds Frankrych erläbt. Ume deheime, bin i Chinderschwöschter gsi. Im Jahr 1945 stirbt üsi liebi Muetter. A ihrer Stell bin i Husmüetti worde. Jetz hets aagfange: Drätti isch mer nid derwider gsi, dass i Chinderarbeit, Jugedgruppe u Lager, de über 20 Jahr mit junge Lüt Gfangenewienachte, Sundigschuel u später bi de Drögeler ha chönne hälfe. Derby isch me a Gäld nid rych worde, z Gägeteil. Für anderi da sy, i ihres Läbe ynelose, hälfe, versta, da het me andere, innere Rychtum gwunne. - Schriftstellere hani es Läbe lang wölle wärde. Zyt derzue het gfählt. Mit achtzgi hani du Zyt gha u ha chönne schribe. We myni Gschichtli anderne hälfe, fröits my. Drätti isch scho lang gstorbe. Mit myr Schwöschter wonen i i üsem Hüsli zäme. A Ufgabe fählts is nie. D Sunne schynt is o a näbelverhangene Tage! So, das wäri chly öppis us myre Läbesgschicht. Gwüss wäger, trotz ere schwäre Chrankheit het viel drinne Platz gha. Eh bhüetis, vo alt wärde rede mer no nid. I has wi Drätti, won er 95 jährig gsi isch u men e bim spaziere het welle begleite, het er gseit: "Du chasch de mit mer cho weni alt bi." (ca. 1994)

Bestände UB Bern